කියුබාවේ ඇත්ත තත්වය මෙන්න!

ලෝකයේ වෙසෙන සධාරණත්වය අගයන ඕනෑම මිනිසෙක් කියුබාවට මහත් සේ ඇලුම් කරයි. කියුබාවෙ හිටපු ජනාධිපති පිදෙල් කැස්ත්‍රෝ සහ විප්ලවයේ නියමුවෙකු වූ චේ ගෙවාරා පරමාදර්ශි පුද්ගලයින් ලෙස එවැන්නන්ගේ සිත් වල ජිවත් වේ. සමාජවාදී කියුබාව ගැන අසද්භාවයෙන් තොරතෝංචියක් නැතිව මිත්‍යාව වපුරන බටහිර මාධ්‍යයේ බලපැමට හසුව ඇති ලංකාව වැනි රටවල වැසියන්ගෙන් කියුබාව පිළිබඳ සැබැ තතු වුවමනාවෙන්ම වසන් ‍කරයි. විශේෂයෙන් බටහිර ධනේෂ්වර රටවල් පුල පුලා බලා සිටින්නේ තම ඊනියා ලිබරල් මතය හෙවත් එකෙක් තව එකෙක් සූරාකන ආකාරයේ රටක් බවට කියුබාව පත්වන තූරුය. නමුත් එකී රටවල මාධ්‍ය තුලින් පවා දැවැන්ත ධනවාදි රටවල් තිබියදි කියුබාව ලෝකය තුල කැපි පෙනෙන දියුණු මානව හා සංස්කෘතික සම්පතක් ඇති රටක් බව ලෝකයාගෙන් වසන් කොට තබා ගැනිමට නොහැකි වී ඇත.

කියුබාව ඇමරිකාවේ අත පොවන මානයේ පිහිටි රටකි. උතුරු කියුබාවේ සිට ඇමරිකාවට ඇති දුර කිලෝ මිටර් 140 කි. ඇමරිකාවට සාපේක්‌ෂව භූමියෙන් ඉතා කුඩා රටකි. එහි විශාලත්වය වර්ග කිලෝ මීටර් 109884 ක්‌ වේ. 2010 සංඛ්‍යා ලේඛනයන්ට අනුව කියුබානු ජනගහනය 11241161 ක්‌ පමණ (මිලියන 11ක්‌) වේ. අධිරාජ්‍යවාදීන්ගේ ප්‍රමුඛතමයා වන ඇමරිකා එක්‌සත් ජනපදය විසින් කියුබාව තම ප්‍රධාන ප්‍රතිවාදියා ලෙස සළකනු ලබයි. එනිසාම ඇමරිකාව විසින් කියුබාවට කරනු ලබන කෙනෙහිලිකම් අපමණය. එපමණක්‌ නොව එම කෙනෙහිලිකම්වල අවසානයක්‌ ද නැත. ඒ සියල්ල කියුබාව සමාජවාදි රටක්‌ නිසාවෙන්ය. එපමණක්‌ නොව එය සැබෑ මාක්‌ස්‌ ලෙනින්වාදයේ පිහිටා සමාජවාදය ගොඩනගන රටක්‌ වීම නිසාය. අතලොස්‌සක්‌ වන ධනපතියන්ගේ සුඛවිහරණය පිණිස වූ ධනපති ක්‍රමය වෙනුවට එහි විකල්පය වන මුළුමහත් සමාජයේම යහපත උදෙසා වන සමාජවාදය, කියුබාවේදි ලෝකයට ආදර්ශයක්‌ හා ධෛර්යයක්‌ වන නිසාවෙන්ය . බටහිර රටවල් මේ සමාජවාදි පුංචි රට දෙස නිතර විමසිල්ලෙන් පසුවෙයි. එය ඒ රටට ඇති කැමැත්තක් නිසා නොව එය මොන යම් හේතුවක් මත බිද වැ‍ටෙනවා දැයි දැන ගැනිමටය. කියුබාවේ ඉතා සුලු සිදුවීමක් පවා උපයෝගීකරගෙන දැවැන්ත ප්‍රචාරයක් ලබා දී අපකීර්තියට ලක්කිරීමට උත්සහ කරයි.

කෙසේ වෙතත් කියුබාව පිලිබඳව පක්ෂග්‍රාහි නොවන අදහසක් ගැනීමට මෑතකදි තනාපති නිලධාරියෙකු ලෙස කියුබාවෙ වසර හතරක් පමන ජිවත් වී ලියන ලද ''කස්ත්‍රෝගේ දේශය ''නම් පොත අපට උපකාරී වේ. මෙහි කතෘ වාමාංශික දේශපාලන පක්ෂයකට සම්බන්ධකමක් නැති අතර සමාජවාදය පිළිබඳ විශේෂ දැනුමක් හෝ ලැදිකමක් දක්වන්නෙකු නොවේ. හුදෙක් රජයේ නිලධාරියෙකි. බටහිර රටවල් ඇතුලු සියලු ධනවාදි රටවල් විසින් 1959 සිට ආර්ථික සම්බාධක පනවා හිරකර ඇතත් තිබෙන අවස්ථාවලින් ගොඩනගාගෙන ඇති සමාජවාදි සමාජ ආර්ථික හැකියාවන් සහ එහි ඇති සංකෘතික වටාපිවාව ගැන මෙය කියවා කියුබාව ගැන නිවැරදි වැටහීමක් ලබාගත හැක.

මේ ඔහුගේ පොතින් උපුටා ගත් කරුණු ස්වල්පයකි.

කියුබානු ජාතිකයන්ගෙ ප්‍රධාන ආහාරය බෝංචි ඇට ය. කලු හා දුඹුරු පැහැයෙන් යුතු මේ බෝංචි ඇට හදුන්වන්නේ''පිරියෝලෙස් - Frijoles නමින් ය. මෙසේ බෝංචි ඇට ආහාරයට ගැනීම කියුබාවේ පමණක් නොව උතුරු ඇමරිකාවේ ද දකුණු ඇමරිකාවේ ද බොහෝ රටවල් ගණනක කරන බවට අපට දැන ගන්නට ලැබිණ.---

පළතුරු කෑමට ත් ඊට වඩා පළතුරු බීම පරිභෝජනයට ගැනීමටත් ඔවූහු ගජ රූසියෝ ය. එළවලු හා පළතුරු එහි ඕනැ තරම් ඇත. ඇපල් පමණක් පිටරටින් ගෙන්වන අතර ලංකාවේ ඇති අලිගැට පේර පවා එහි යහමින් ඇත.

ඔවුන් ඉතා හොද කහපාට දොඩම් මිළයට ගන්නේ දෙකතුනක් නොව 50 ක් පමණ ඇති මල්ලකි. ඔවුන් බෙහෙවින් පිරිය කරන පළතුරු බීම සැදිම පළතුරු ගෙන යන අන්දම නම් අපට සිනා උපදවන සුළුය. තැලී පොඩිවුණ ඕනෑම පළතුරක් කිසිම සොයා බැලීමකින් තොරව මිළ දී ගන්නා ඔවුන් ලෙල්ල කළු වූ ඕනෑවට වඩා ඉදිණු කෙසෙල් ගෙඩි පවා මිළයට ගෙන යති. අප පළතුරු ගැනීමට වෙළද පොළට ගිය විට පළතුරු අතට ගෙන ඒ මේ අත හරවා බලා ඇගිල්ලෙන් ද ඇන හොද දැයි බලන විට කිසි දිනක ලංකාවේ වෙළදුන් මෙන් මුහුණ නරක් කරගෙන රොස් පරොස් බස් කීවේ නැත.---

ඔවුන්ගේ ව්‍යයාම ගැන කතා කළහොත් පැවසිය යුත්තේ සය හැවිරිදි දරුවාගේ සිට 85 වියැති වැඩිහිටියා දක්වා සැවොම ව්‍යායාම් කිරිමේ අගය දන්නා බවයි. දිනපතාව අවුරැදු 6,7 දරුවන් පවා තම සහෝදර සහෝදරියන් සමග කිසිවෙකුගේ විධානයක් නොමැතිව තම ගෙමිදුලෙහි ව්‍යායාම් කරනු බලා සිටීම ඇත්තෙන්ම ඉතා පිරිය ජනකය. උද්‍යානවල ද මහා මාර්ගවල පදික වේදිකාවල ද සෙමෙන් දුවන (Jogging) විවිද වයස්වල ස්තී පුරුෂයන් සිය ගණන් දිනපතා උදේ සවස දැකිය හැකිය. අවුරුදු 80,90 පමණ නිරෝගී වැඩිහිටි අය තම නිවෙස් අසල පිහිටි කුඩා උද්‍යානවලට කැඳවා රජයේ උපදේශකයින් විසින් ඔවුන්ට සෙමින් අත් පා සොළවන ‍භෞතචිකිත්සක ව්‍යායාම් කරවීම සුලබ දර්ශනයකි. ---

ඔවුන් වෙත හොද සෞඛ්‍ය පුරුදු ඇත. සමහර ඒවා රජය විසින්ම පනවා ඇති ඒවා ය. උදාහරණයක් ලෙසින් කියහොත් සෑම වැඩිහිටි කාන්තාවක්ම අවුරුද්දකට දෙවරක් ළගම ඇති රෝහලට ගොස් තම සිරුර පරීක්ෂා කරවා ගත යුතු බව දැක්විය හැකිය. ඒ පියයුර පිළිකා සහ ගැබ් ගෙල පිළිකා ඇත්දැයි දැනගැනීමටය.---

එසේම සෑම අයෙක්ම වසරකට වරක්වත් දන්ත වෛද්‍යවරයෙකු හමුවී තම දත් පරීක්ෂා කරවා ගනී. උදේ සවස පමණක් නොව දවල් ආහාරයෙන් පසු පවා තම දත් පවිත්ර කර ගැනීම ඔවුන්ගේ සිරිතය. ඔවුන් යම්කිසි බරක් ඔසවන්නේ නම් හැම විටම ඉන වටා අගල් හයක් පමණ ඝණකම ඇති ආරක්ෂිත බඳ පටියක් (Corset- එකක්) බැඳ ගැනීමට අමතක නොකරයි. බර වැඩ කරන කම්කරුවන් සියල්ලටම රජය විසින්ම ඒවා සපයා ඇත.---

රජයේ රෝග මර්ධන ව්‍යාපාර අතිශයින් සාර්ථකය. දැඩි මදුරු වසංගතයෙන් බේරීමට ඉතා හොද පියවරක් ගෙන ඇත. මදුරුවන් වැඩි කාලයට නිවෙස වලටම පැමිණ සති කිහිපයක් එක දිගට යන්තර වලින් දුම් ගසනු ලැබේ. එවිට නිවසේ ඇති ආහාර පාන හා ජලය ආදිය සුරක්ෂිතව ආවරණය කොට නිවසේ දොර ජනෙල් ද වසා නිවැසියන් එළියේ සිටිය යුතුය. ඉන් පසු මුහුණ ආවරනය කරගත් සේවකයෙක් ඇතුළට ගොස් යන්තරයකින් ලොකු දුමාරයක් මුලු නිවස පුරාම ඉසිනු ලැබේ. ඔහුව අධීක්ෂණය කිරිමට මුහුණු ආවරණය කර ගත් නිලධාරියෙකුද හැම විටම පැමිණේ.පැය භාගයක් පමණ කිසිවෙක් ඇතුළට යාම නොකළ යුතුය. ඒ දිනවලට සවස හයට හතට පමණ ලොරි වලින් මහා මාර්ගවල ද අතුරු මාර්ගවල ද මේ දුම පුරුවා හරින අතර ඒ වේලාවට පහතින් පියාසර කරන කුඩා ගුවන් යානයකින් ඉහළ සිට පහළට ද මේ දුම පැතිරුවා හරිනු ලැබේ. ---

නිබදව කෙරෙන වෛද පරීක්ෂණ ඔවුන් වෙත ඇත. මේ පරීක්ෂණ වලින් ඉහළ ම ප්‍රතිඵල ඔවුන් ලබාගෙන ඇති බව ද කිව යුතුය. මව්වරුන්ගේ දරු ප්‍රසූතියෙන් පසු ලැබෙන වැදෑමහ (Placenta)උපයෝගි කරගෙන සුදු කබර රෝගයට (Vitiligo)ඉතා ප්‍රත්‍යක්ෂ ඖෂධයක සොයාගෙන ඇත. එකී ප්‍රතිකාරය ලබාගැනීමට නන්දෙසින් රෝගීහු එරටට පැමිණෙති. මෙම පර්යේෂණ ආයතනයෙන්ම තවත් චර්ම රෝග සදහා ඖෂධ නිපදවා ඇත. කෝමාරිකා ශාකයෙන් ද විවිධ ඖෂධ නිපදවන අතර ඒ සදහා මහා පරිමාණයෙන් කෝමාරිකා පැළෑටි වගා කිරිම ද කරනු ඇත. මී පැණි වලට ශාක සාර වර්ගයක් මිශ්‍ර කොට ඇදුම සදහා නිපදවූ ප්‍රත්‍යක්ෂ ඔසුවක් ඇත. ඉවත දමන දොඩම් ලෙල්ලෙන් සෙම්ප්‍රතිශ්‍යාව සදහා නිපදවා ඇති ඖෂධය එරට දී කොත්තමල්ලි සොයාගත නොහැකි අපට ද බොහෝ පිහිට විය.---

අජීර්ණ ඇතිවිට ඔවුන්ගේ අත් බෙහෙත කිරි අල තම්බාගෙන කෑමයි. මෙය පළමුව දැනගත්තේ අපගේ කාර්යාලයේ මුලින් සිටි රියදුරු වූ වැඩ්මියර් ගෙනි. දිනක් ඔහුට අජීර්ණයක් ඇති වූ අවස්ථාවේ සුදුසුකම්ලත් වෛද්‍යවරියක වූ ඔහුගේ බිරිද ලබා දී ඇති ප්‍රතිකාරය නම් කිරි අල තම්බා දීමයි. අවශ්‍ය නම් ඇයට බටහිර ප්‍රතිකාරයක් කිරීමට හොදට පහසුකම් තිබිණි. එහෙත් ඇය තම පාරම්පරික අත්බෙහෙත් වලට මුල්තැන දී ඇත.

ලෝකයේ හොදම සෞඛ්‍ය සේවාවක් කියුබාවේ ඇත. අඩු ළදරු මරණ සහ ආයු කාලය වැඩිවීම ආදියෙන් ඒ බැව් පෙන්නුම් කෙරේ. සෑම නිවාස 200 කට පමණ කුඩා රෝහලක් පිහිටුවා තැබීමෙන් ම එය පෙන්නුම් කෙරේ. ඒ නිවාස වල ජනතාව තම අවශ්‍යතා සදහා පළමුව යා යුත්තේ එම රෝහල් වලට ය. විශේෂඥ ප්‍රතිකාර අවශ්‍ය වුවහොත් ඒ රෝහල් වල වෛද්‍යවරුන්ගේ නිර්දේශය මත විශාල රෝහල් යලට ගිය හැකි ය. රෝහලට පැමිනිය නොහැකි වැඩිහිටියන් ගැන පරීක්ෂා කිරීමට මේවායේ වෛද්‍යවරු හෝ හෙදියෝ එම රෝගින්ගේ නිවෙස් වලටම පැමිණෙති. ඒ සදහා ඔවුන්ට මෝටර් රථ වුවමනා නැත. පයින් හෝ බයිසිකලයෙන් එසේ පැමිණෙති. එසේ පැමිණ රෝගියා පරීක්ෂා කර අවශ්‍ය නම් ලේ,මුත්‍රා ආදිය ද පරීක්ෂා කර බලා පසුව ඖෂධ නිවසටම ගෙන විත් දෙති. මේ වෛද්‍යවරු ඉතාමත් නිහතමානිය. මහජන මුදලින් ඉගෙනගෙන අහිංසක රෝගීන් ඉදිරියේ අහංකාරව හැසිරෙන ලංකාවේ සමහර වෛද්‍යවරුන් වැනි අය එහි ඇත්තේ ම නැත. අපගේ අසල්වැසි නිකෝ ගේ මහලු පියාට එසේ ප්‍රතිකාර කිරීමට පැමිණි වෛද්‍යවරිය සහ හෙදියක මම දුටුවෙමි. අදාළ ඹෟෂධ නිවසටම ගෙනවුත් දී රෝගියාට සුබපතා ඔහුගේ මුහුණ ද සිඹ එම වෛද්‍යවරිය හා හෙදිය පයින්ම නික්ම ගිය අයුරු මම විශ්මයෙන් බලා සිටියෙමි.---

මෙහි රෝහල් ගැන කියතොත් වර්ග තුනක රෝහල් මෙහි ඇත. විදේශිකයන්ට පමණක් වෙන් වූ ඉතා ඉහළ මිළ ගණන් අය කරන සුපිරි රෝහල්, විදේශිකයන්ගෙන් මුදල් අයකර ගන්නා වූ ද ස්වදේශිකයන්ට නොමිලේ ප්‍රතිකාර කරන්නාවූද රෝහල් හා විදේශිකයන්ට ඇතුළු විය නොහැකි ස්වදේශිකයන්ට පමණක් වෙන්වු රෝහල් මෙහි ඇත. ස්වදේශිකයන්ගේ රෝහල් වල අසාධ්‍ය රෝගීන් ළග නැවතීමට ගැහැණු පිරිමි භේදයක් නොමැතිව කිට්ටු නෑයින්ට ඉඩදෙනු ලැබේ.---

කියුබාවේ කාර්යාලවල සේවය කරන අයගෙන් 80% ක් පමණ තරුණ කාන්තාවන් බව කිව යුතුය. මා උදෑසන කාර්යාලයට යන විට ළදරු කරත්ත වල තම කුඩා දරුවන් නංවාගෙන දාරක මධ්‍යස්ථාන වෙත කඩිසර ගමනින් යන තරුණ කාන්තාවන් සිය ගණනක් දිනපතා හමු වේ. ඉන්පසු ඔවුහු සේවය කරන ආයතන වලට යති.බොහෝ කාර්යාල වලට දොරටුව අසලම එහි සේවය කරන අයගේ ඡායාරූප ද නම ද දැක්වෙන පුවරු ඇත. (අපේ රටෙහි ද බ්‍රිතාන්‍ය මණ්ඩල පුස්තකාල වල එසේ තිබෙනු මා දැක ඇත.) එහෙයින් සේවය අවශ්‍ය කෙළින්ම අදාළ ---

මැති ඇමතිවරූන්ට පමණක් නොව සමහර අවස්ථාවල රටෙ ජනාධිපතිට පවා පිදෙල් කියා ආමන්ත්‍රනය කරන සමාන්‍ය මිනිසුන් මා දැක ඇත. ---

රටෙ ඉහලම තනතූරූ දරන රාජ්‍ය නිලධාරින් හා ඇමතිවරු පවා ඉති නිහතමානිය අවශ්‍යතා ඇති ඔනැම කෙනෙකුට ඒ අය සහ හා කථා කල හැක.---

මෝටර් රථයේ ඇමතිවරයා සමග ගියේ ඔහුගේ රියදුරා පමනකි. මේ රථයේ ඇති එකම වෙනස එහි රේඩියෝ දුරකථන පනිඩුඩ යන්තරයක් සවි කර තිබිමය.---

සියලුම කාර්යාල වල සේවකයින්ට රජය විසින් දහවල් ආහාරය සුලු මුදලකට සපයනු ලැබේ. ආහාර පිසිමට නවින මුලු තැන් ගෙවල් ද ආහාර ගෙයැමට උනුසුමි භාජනද ඒවා විවිද ස්ථාන වලට රැගෙන යැමට විශේෂ වාහන ආදිය ද ඇත. රෝහල් කර්මාන්තශාලා ආදිය සදහා රාත්තිරියටද මෙලෙස කැම සපයනු ලැබේ. රෝහල් ආදියෙහි සමහර විට පැය 24ක සේවා මුරයක්ද ඇත. සේවකයන්ට දින දෙකක නිවාඩු ලැබේ. මේ සියලු සේවකයන්ට පවුලේ සිටින සංඛ්‍යාව අනුව මසකට පාවිචිචිය සදහා සබන්, රෙදි සෝදන කුඩු, දත් බෙහෙත්, වැසිකිලි සදහා පාවිච්චි කරන කඩදාසි රෝල් ආදිය පිරවු මල්ලක් නොමිලේ ලැබේ.---

කාර්යාල පමනක් නොව රටේ ඇති සියලුම වෙළදසැල්, හෝටල්,බේකරි හා බාබර් සාප්පු ආදියද රජයටම අයත් නිසා ඒවායේ සේවකයින්ටද මේ සියල්ල ලැබේ.---

මේ රටෙ නිවාඩු ඇත්තේ ඉතාම සුලු ගණනකි. අනෙක් අතට නිකරුනේ නිවාඩු ගැනිම කරන්නේද නැත. එහෙත් වසරකට වරක් ලැබෙන දින 10 නිවාඩුව ගැන පුන පුනා බලා සිටි. ඒ සිය පවුලත් සමග ඇත පළාතක රජයේ නිවාඩු නිකේතනයකට යැමටය.---

මෙම රටේ සිසුවියන් දුටු මුල්ම දිනයේ මගේ බිරිද කිවේ ලොව කෙටිම සාය අදින්නේ මෙම සිසුවියන් බවය. පාසැල් ගුරූවරියක් වු ඈ භිතියෙන් මෙන් මේ ගැහැනු ලමුන් දෙස බලා සිටිනු මම දුටිමි.---

තරුණ ශිෂ්‍ය ශිෂ්‍යාවන් පාසැල් පැමිණෙන්නේත් ආපසු යන්නේත් එක අතකින් පොත් මිටිය ගෙන අනික් අතින් තම මිතුරා හෝ මිතුරියගේ ඉනවටා අතයවා ඔවුනොවුන්ට තුරුල් වීය.---

මෙහි දි ඇදහිය නොහැකි දෙයක් වන්නේ සමහර සිසු සිසුවියන්ට දරුවෙකු ලැබීමට සිටිය දී පවා පාසලට ඒමට හැකි වීම යි.---

විනයාකූලව කටයුතු කරන්නේ නැත්දැයි පසුව මා සමග මිතුරු වු එක් කියුබානු ගුරුවරයෙක් ගෙන ඇසු විට ඔහු සිනාසුනේය. එය හරියට මා මෝඩ ප්‍රශ්ණයක් ඇසුවා වැනිය. ඔහු කීවේ ඒවා ස්වභාවික දේවල් බවත් වඩා වැදගත් සිසුවියන්ගේ ඉගෙනීම බවත්ය.--

අප සිටි වීදියේද නිවසක එවැනි එක් දැරියක් වූවා ය. ඇය මගේ බිරිඳ සමග ද නිතර කතා බහා කළ පාසැල් සිසුවිය කි. නිළ ඇදුමින් සැරසී පාසැල් ගිය මේ ගැබිනි සිසුවිය දැකීම පවා අපගේ හදවත්වලට බරක් වුණු නමුත් ඇයගේ දෙමව්පියන්ට නම් එය ප්‍රශ්ණයක් නොවූ බව පෙනුණි. ඇය ටික කලකට පසු දරුවා ලැබුණ පසු දරුවා රැකබලා ගැනීම දාරක නිවාසයකට පවරා කිසිවක් නොසිදු පරිද්දෙන් සුපුරුදු පරිදි පාසැල් යනු අප දුටුවෙමු. දරුවාගේ පියා කවුදැයි ගැටලුවක් කිසිදිනෙක කියුබාවේ දී පැන නගින්නේ නැත.---

නමුත් අධ්‍යාපන විෂය මාලා අතින් නම් එරට සිසුන් බොහෝ ඉදිරියෙන් සිටින බව කිව යුතුය. සෑම සිසුවෙකුටම වඩු වැඩ,මේසන් වැඩ, ජලනළ සවිකිරීම, හා විදුලි කාර්මික වැඩ ආදිය ගැන මූලික දැනුමක් ඇත. සිසුවාගේ දක්ෂතාවය අනුව ඔහු යා යුතු ක්ෂේත්‍රය ගැන මග පෙන්වීමක් කරනු ලැබේ. ඒ අනුව සංගීත,නැටුම්, ක්‍රීඩා, වෛද්‍ය විද්‍යාව, වෙනත් සෞඛ්‍ය සේවා, ඉංජිනේරු ශිල්පය හා සංචාරක කර්මාන්තය වැනි හැම ක්ෂේත්‍රයක් සදහාම විශ්ව විද්‍යාල මට්ටමින් ඉහළම අධ්‍යාපනයක් ලැබීමට හැකි ආයතන රට පුරාම ඇත.---

කිසි විටක දරුවන් පියා සමග තනිකර වෙන කෙනෙකු සමග හාදකම් පැවැත්වීම කියුබානු කාන්තාවෝ කරන්නේම නැති දෙය කි.

දික්කසාද වූවන් කිසිවිටෙන ඔවුනොවුන් අතර අසමගියක් නැතිවීම පුදුමාකාරය.---

දිනපා සිප වැළද ගැනීම ඔවුන්ගේ සිරිත බැවින් එසේ පැමිණෙන පැරණි ස්වාමිපුරූෂයා සිප වැළද පිළිගෙන ඔහුට කිසියම් බීම වර්ගයකින් පවා සංග්‍රහ කර යැවීම පැරණි බිරිදගේ සිරිත ය.

මීටත් වඩා පුදුමු කරුණක් නම් සමහර පිරිමින් තම දරුවන් බැලීමට එන්නේ තමාගේ අලුත් පෙම්වතිය ද සමග වීමයි. අප මෙය දන්නේ අපේ හොද මිතුරකු දිනක් අප නිවසට පැමිණි විට කීවේ තමා මදක් පමා වූයේ තමා එදින තම අලුත් පෙම්වතිය තම පැරණි බිරිදට හා දියණියට හදුන්වා දීමට එම නිවසට ගිය බව ය. තවදුරටත් ඔහු කීවේ ඔවුන් කලු ජාතිකයන් වූවත් අලුත් '''පුංචි අම්මා'" සුදු කාන්තාවක වීම ගැන තම දියණිට බෙහෙවින් සතුටු වන බවයි. මෙහි ඇත්ත නැත්ත නම් කෙසේදැයි අපට කිව නොහැකි ය.

සමහර විට පියා සති අන්තවල තම අලුත් පෙම්වතියගේ හෝ බිරිදගේ නිවසට තම දරුවන් කැදවාගෙන යන අවස්ථා ඇත.

පෙර අවස්ථාවක දැක්වූවා සේ දික්කසාද වූවා කියා ඔවුන් අමනාප නොවී සිටිම පුදුම සහගතය.

සැමියා අතහැර ගියා කියා බිරිද ද කනස්සලු වන්නේ නැත. ඇය ඉක්මනින් ම පෙම්වකෙතු සොයා ගැනීම සාමාන්‍ය සිරිත වීම නිසා ය. ඉන්පසු මේ අලුත් පෙම්වතා අර කාන්තාවගේ නිවසේ පදිංචියට පැමිණෙන අතර ඇගේ දරූවෝද මේ ''අලුත් බාප්පා" සාදරයෙන් පිළිගනිති!

අප එරටට ගිය අලුත ඔවුන් තම නෑයින් හදුන්වා දුන් ආකාරයෙන් අප මවිත වීමු."මේ ඉන්නේ මගේ අම්මාගේ ස්වාම්පුරුෂයා" "මගේ තාත්තාගේ භාර්යාව හදුනා ගන්න" "මේ තමයි මගේ ස්වාමිපුරුෂයාගේ දුව" "මගේ භාර්යාවගේ පුතුන් දෙදෙනා මේ තමයි"

කිසියම් අභාග්‍යයක් නිසා පවුල් සංස්ථාව කඩා වැටුණ ද කිසිදාක ඔවුනොවුන් අතර අමනාපකම් නැති වීම නම් අගේ කළ යුතු යයි සිතමි.

නත්තල් දිනයට ඒ පියවරු තෑගි බෝග ද රැගෙන තම දරුවන් බැලීමට පැමිණෙති. එවිට මව ඔවුන් තිදෙනාම එකම මේසයකට කැදවා සංග්‍රහ කර යවන බව අප සමග කීවේ අපගේ අසල්වැසි මිතුරිය සයිඩා විසින් ය.

කීඩාවට කියුබානු ජාතිකයෝ ලබා දෙන්නේ අති විශේෂ තැනකි. රට කුඩා වූවත් දැවැන්ත රටවල් හා කරට කර සිටීමට දක්ෂතා ඇති කියුබානු ක්‍රීඩක ක්‍රීඩිකාවෝ අති විශාල ගණනක් එරට සිටිති. ඒ අතර ලෝක ශූරයන් ගණනාවක් ද ඇත. අතීතයේ දී ලොව පුරා ජය කෙහෙලි නැංවූ කියුබානු කීඩකයන් අතර කඩු සටන් වලට ද දක්ෂ (Fencing) රාමොන් පොන්ස්ට්, චෙස් කීඩාවේ දී අපරාජිත හොසේ රාවුල් කපබලන්කා, පීලික්ස් සැවෝන් නම් ඇති ශූර බොක්සිං කීඩකයා,කෙටි දුර ධාවය ශූර රපයෙල් පොfරුවන් හා බේස් බෝල් කීඩාවේ විස්කම් පෑ ඩිහිගෝ යන අය ප්‍රධානය. (Ramon Fonts, Jose RaulCapablanca, Felix Savon, Rarutun & Martin Dihigo) මෑත අතීතයේ තිබු ඔලිම්පික් තරග ගැන අධ්‍යයනයක් කරන්නෙකුට දැකිය හැකි ඉතාම පැහැදිලි දෙයක් නම් කියුබාව පදක්කම් වැඩිම ගණනක් දිනන රටවල් 10 ට හැම විටම ඇතුලත් බවයි.---

ඇමරිකා මහද්වීපයේ රටවල් අතර පමණක් පවත්වනු ලබන"පෑන් ඇමරිකන්" (Pan American Sport) ක්‍රීඩා තරඟ ඉසව් වලදි කියුබාවට වඩා පදක්කම් ගන්නා එකම රට ඇමරිකා එක්සත් ජනපදයයි. කැනඩාව, බ්‍රසීලය, මැක්සිකෝව හා ආජන්ටිනාව වැනි විශාල රටවලට කියුබාවට කිට්ටුවීමටත් නොහැකිය.---

දක්ෂ කීඩක කීඩිකාවන්ට රාජ්‍ය අනුග්‍රහය නොමදව ලැබේ.---

නැටුම් ගැන කතා කළහොත් ඔවුන් නොදන්නා නැටුමක් නැති තරම් ය. සෑම කෙනෙකුටම යුගල නැටුම් නැටිය හැකි ය. පාසැල්වලදී කුඩා ළමුන්ට පවා ඒවා උගන්වනු ලැබේ. සංචාරක හෝටල් ආදියේ දී රම්බා හා කැබරේ Ramba & Cabaret යන ජනප්‍රිය නැටුම් ද කොතෙකුත් දක්නට ඇත.---

එරට රූපවාහිනි නැරඹිම ගැන කියතොත් එය හොඳම විනෝදාංශයක් වී ඇත. අපේ රටේ මෙන් කෙළවරක් නොමැති වෙළද දැන්වීම් නැති නිසා ඒවා නැරඹීම වදයක් නොවේ. වැඩසටහන් වලට අමතරව බොහෝ විට පෙන්වන්නේ සාරධර්ම අගයන දර්ශන පමණකි. මහලු අයට සැලකීමේ වැදගත්කම,ආබාධිත අයට උපකාර කළ යුතු බව, සතුනට හිංසා නොකළ යුතු බව, විදුලිය හා ජලය නාස්ති නොකල යුතු අන්දම ගැන මෙන්ම ඒඩ්ස් රෝගයෙන් හා වෙනත් සමාජ රෝග වලින් වැළකිය යුතු අන්දම ගැන දැනුවත් කිරිම් ගැන දර්ශන හැර වෙනත් කිසිදු වෙළද දැන්වීක් රූපවාහිනියෙන් පෙන්වනු නොලැබේ.

එරට ඇති ටෙලි නාට්‍ය ගැන කියතොත් කියුබානු ටෙලි නාට්‍ය වලට අමතරව බසීලය, ස්පාඤ්ඤය, කොලොම්බියාව ආදී රටවලින් ගෙන්වනු ලබන උසස් දීර්ඝ ටෙලි නාට්‍ය දිනපතාම වාගේ පෙන්වනු ලබන අතර සෑම චිත්තර පටියක්ම පටන් ගැනීමට පෙර ඒවා ළමුන්ට නැරඹිමට සුදුසු ද නැද්ද යන්න අනිවාර්යයෙන්ම දක්වනු ලැබේ.---

එරට වැසියන්ටඇති තවත් ඉහළම විනෝදාංශයක් නම් මුහුදේ නෑමයි. රට දූපතක් නිසාද වියළි කාලගුණයක් ඇති නිසා ද එයට හොදම අවකාශ ඇත. හවානා නගරය අවට ද මුහුදේ නෑමට සුදුසු ස්ථාන බොහෝමයක් ඇත.

පවුල්වලට දරුවකු ඉපදී පළමු අවුරුද්ද පිරෙන දිනයේ දී ඒ සදහා ලොකු උත්සවයක් සංවිධානය කිරිම ඔවුන්ගේ සිරිතක් ය. එදින බොහෝ අමුත්තන්ට ආරාධනා කරන අතර ඒ අය සැවොම රැගෙන එන තෑගි වල අංක 01 සදහන් කර තිබේ. නිවස ඉදිරිපිට ද අංක 01 දැක්වෙන බැලුම් බෝල රාශියක් එල්ලනු ලැබේ. මේ උත්සවය ගැන මා එක් කියුබානු මිතුරගෙන් විමසූ විට ඔහු කීවේ දරුවෙකු නීරෝගීව ජීවත් කරවීමට ඉතාම දුෂ්කර වන්නේ පළමු අවුරුද්දේ බවත් එය පසු කිරිම යනු දරුවාගේ ජීවිතය ස්ථීර බව පෙන්වන නිසා මෙය ප්‍රීතියෙන් සැමරිය යුතු අවස්ථාවක් බවයි.

මෙ අනුව සමාජවාදී කියුබාව ගැන පැහැදිලි පින්තූරයක් සිතා ගත හැක.

- නීතිඥ සරත් විජේරත්න මහතාගේ ලිපියකින් උපුටා ගන්නා ලදි. -